प्रेमीसँग मिलेर देवरको हत्या, भाउजु कारागार चलान

महोत्तरी । देवरको हत्या गरेको अभियोगमा एक महिलालाई कारागार चलान गरिएको छ । प्रेमीसँग मिलेर देवरको हत्या गरेको अभियोगमा सम्सी गाउँपालिकाकी २८ वर्षीया सगिरा खातुनलाई महोत्तरी जिल्ला अदालतले पुर्पक्षका लागि मंगलबार कारागार चलान गरेको हो ।

पति वैदेशिक रोजगारीमा रहेका बेला आफ्नै घरमा बोलाएर परपुरुषसँग अवैध सम्बन्ध राखेकै बेला आपत्तिजनक अवस्थामा खातुनलाई देवरले देखेका थिए । आपत्तिजनक अवस्थामा देवरले भेटेपछि खातुनले प्रेमीसँग मिलेर उनको हत्या गरेको जिल्ला प्रहरी कार्यालयका प्रहरी उपरीक्षक श्यामकृष्ण अधिकारीले जानकारी दिनुभयो ।

रकिवुल अन्सारीकी पत्नी खातुनले प्रेमीसँग मिलेर गत चैत ९ गते देवर १३ वर्षीय मजिबुको घाँटी थिचेर हत्या गरेकी थिइन् । हत्यापछि शव घर नजीकै रहेको कब्रस्तानमा गाड्न लगिरहेका अवस्थामा स्थानीयवासी सदिक मोमिनले घटनाबारे जानकारी गराएपछि प्रहरीले शव नियन्त्रणमा लिएको थियो ।